domingo, 15 de abril de 2018

A Mocidade Comunista perante a folga do 19 de abril.

Este 19 de abril hai convocada unha folga de estudantes na que como comunistas debemos analizar de onde parte, con que finalidades e a súa posibilidade de éxito; así como expresar en que medida esta folga é a folga que necesita o alumnado tendo en conta as características da mesma. 

Esta folga é convocada fai algo máis dun mes pola Asemblea Aberta de Mulleres da USC, despois de ser plantexada nas Asembleas Abertas (principalmente da USC). Sen saber moi ben como a folga saltou dunha asemblea a outra, o STEG, Sindicato de Traballadoras e Traballadores da Educación de Galiza, afirma que a folga é convocada por Erguer, Anega e Acción Universitaria. O resultado é que, como tradicionalmente vén pasando, a folga á que os estudantes e as estudantes estamos convocadas xorde non sabemos moi ben de onde, pero estamos convocadas. A diferenza semella ser que os sindicatos de traballadores e traballadoras non convocan e que a folga é unicamente en Galiza. 

Todo isto marca diferenzas con dinámicas anteriores, como as dinámicas do curso pasado, cando o 9 de marzo o conxunto da Comunidade Educativa convocaba folga estudantil en todo o Estado. Fóra de apuntarse tantos, alumnado e profesorado saímos ás rúas dunha forma en que facía tempo que non saíamos. Porque si, o alumnado segue reivindicando os seus dereitos e loitando, porque nos centros de ensino de todas as ramas hai problemas que necesitan resolverse, ademais do 3+2, a LOMCE e o conxunto de medidas privatizadoras e contra a nosa educación. 

Non obstante, esta folga do dezanove de abril probablemente teña pouca repercusión nos centros de ensino de Galiza, debido á pouca información do alumnado con respecto a esta, mesmo sen saber que existe a poucos días da mesma. Partindo disto, desde a Mocidade Comunista o mínimo é apoiar ó alumnado que decida facer folga e loitar polos seus dereitos, pero non só iso, desde a Mocidade Comunista queremos participar da folga e propoñer un modelo de folga combativo, que parta do sindicalismo de base e diario pero que sexa capaz de unir forzas contra as medidas privatizadoras. Polo tanto, entendemos que hai unha serie de puntos sobre os que traballar de forma propositiva con respecto da nosa educación e do movemento estudantil: 

1º Recuperar a utilidade sindical e democrática. Entendemos que é esencial que o alumnado se organice no seu centro de estudo para resolver os problemas existentes nel, xa sexan problemas orzamentarios, falta de material ou problemas co transporte como a masificación das aulas. Estes son problemas xeralizados que necesitan solución. Sobre a base destes problemas reside a capacidade de organización propia, sempre desbotando o sindicalismo de cúpulas e promovendo a unidade da Comunidade Educativa. 

2º Promover a unión do alumnado baixo formas sindicais democráticas que analicen consecuentemente os problemas que asolagan os centros de ensino e sinalar conxuntamente o momento concreto para a apertura de ciclos mobilizatorios e combativos. A través do sindicalismo de base e asembleario situar os elementos que faciliten que a loita dos centros de ensino remate en ciclos de mobilización e combate que poñan ó conxunto da Comunidade Educativa en situación de esixir solucións. Desbotemos as folgas mecánicas e festivas: debemos convertir a mobilización en organización e en solucións. 

3º Situar a loita estudantil na coxuntura axeitada. Debemos traballar para que as mobilizacións de carácter estudantil, ademais de mellorar a súa capacidade de mobilización e presión baixo as condicións anteriores, se enmarquen nun ciclo de mobilización do conxunto do pobo traballador: contra a represión xeralizada, por unhas pensións dignas, pola igualdade, contra as guerras entre pobos e, en definitiva, contra todos os aspectos nos que o capital nos perxudica como pobo traballador.

Este 19 de abril, os Colectivos da Mocidade Comunista apoiamos a folga e loitamos por un modelo de sindicalismo con capacidade de vitoria para o alumnado. Este 19 de abril, comezar a ganar a nosa educación!

mércores, 2 de agosto de 2017

Comunicado - Este verán: organízate contra a explotación, contra o machismo e o consumismo!







                Chega o verán e con el ábrese un novo escenario para a mocidade marcado polo traballo estacional e polas festas en moitas vilas e cidades. Por unha banda, respecto ao traballo estacional, con el a clase traballadora sofre dende a ausencia de contratos ata a realización de centas de horas extra non pagadas. As condicións son especialmente descarnadas para as mulleres mozas: exemplo disto é a dobre escala e a fenda salarial pola que nos pagan entre un 20% e un 30% menos nos nosos traballos, ou os requisitos físicos que moitas empresas privadas poñen para poder acceder ao emprego. Pretenden, así aproveitarse do noso físico en postos tan diversos como camareiras, captadoras de clientes para locais de restauración, bailarinas, vendedoras, e unha longa lista de empregos.

                Pois é que as mulleres traballadoras non só sufrimos explotación como obreiras, senón tamén discriminación polo noso xénero. Así, á maior explotación laboral debemos unir outras problemáticas que sufrimos , tales como as restricións ó noso dereito a abortar e o control da nosa saúde sexual, a violencia machista nas súas múltiples formas, e un longo etcétera. Hoxe, as mulleres mozas traballadoras padecemos unhas condicións de vida e traballo que atentan contra a nosa integridade física e mental.

                Pero, pola outra banda, o verán tamén está marcado polas festas populares, nas que participan moitos mozos e mozas. A diversión, o alcol, a música, os bailes..., ademais da aparente diversión levan consigo outras realidades normalmente non tan evidentes. Dende os Colectivos da Mocidade Comunistas (CMC) vemos a necesidade de denunciar que tralos eventos desta índole, moitas veces ocultase, ademais do absoluto desprezo aos dereitos laborais, unha lamentábel realidade, que non é outra que a gran cantidade de actitudes e agresións machistas que sufrimos as mulleres, chegando nos casos mais graves a producirse agresións sexuais e violacións.

                Cantos anos levamos escoitando que se agrede a mulleres mozas nas festas das nosas vilas e cidades? Chegamos a un punto no que está normalizado escoitar que se produciu unha violación nas festas, camuflándoo baixo a escusa da festa e do alcol, ou incluso chegando a criminalizar á vítima. Pero a integridade vital das mulleres non pode estar en risco ningún minuto mais, non podemos seguir deixando que este tipo de accións se xustifiquen, normalicen ou se silencie ás súas vítimas cando deciden dar un paso adiante denunciando o que sufriron.

                Mais cabe facerse unha pregunta mais: cal é o contexto onde maioritariamente se dan estas agresións durante o verán? O da festa, o do alcol, que reproducen un modelo de ocio baseado no inmediato, na necesidade de vivir experiencias extremas e no consumismo como única vía de diversión. Os Colectivos da Mocidade Comunista loitamos para que as festas, como o resto de ámbitos no que se relaciona a mocidade, estean libres de machismo, explotación ou violencia para todas e todos. Isto pasa por traballar con determinación para construír un novo modelo de ocio na mocidade, un modelo onde a diversión sexa parte da cultura popular, en base a uns principios elementais de respecto, tolerancia, colaboración, axuda, etc.

                Por iso, a Mocidade Comunista pretende este verán facer unha campaña para poñer ao descuberto a situación que vivimos as mulleres traballadoras en ámbitos tan diversos como o emprego, o ocio ou os nosos dereitos sexuais, denunciar a explotación e a opresión que condiciona o noso dia a dia, e abrir horizontes en canto á concepción do ocio entre a mocidade.

                Este verán: organízate contra a explotación, contra o machismo e o consumismo!

                Colectivos da Mocidade Comunista.
               

sábado, 27 de maio de 2017

Ante a causa archivada de Jose Manuel Baltar por acoso sexual




                O pasado día 23 de Maio, a persoa titular dos Xulgados en materia de Violencia de Xénero de Ourense concedíalle o indulto ó Presidente do Partido Popular e da deputación de Ourense, o señor Jose Manuel Baltar, denunciado por tráfico de influencias, cohecho e acoso sexual, o que implica o cese da investigación sobre a súa persoa en relación a uns feitos que nin sequera o xulgado nega que se produciran.

                Dende o PCPE – Comunistas da Galiza e os Colectivos da Mocidade Comunista queremos denunciar a farsa de indulto que se lle concede ó presidente da Deputación de Ourense, xa que en primeiro lugar atenta contra a dignidade da agredida e a reprodución ideolóxica do machismo, e en segundo lugar, pola evidente vinculación e influencia do presidente da Deputación nesta institución. Estes feitos so evidencian unha vez máis a complicidade do sistema xudicial coa burguesía e os seus mamporreros políticos; que a pesar de que existen probas de sobra para continuar coa investigación, simplemente se obvian descaradamente, mantendo en liberdade e en cargo público a un corrupto e acosador como Jose Manuel  Baltar, froito dunha política burguesa completamente dexenerada e podre.

                Non podemos consentir de ningunha maneira que estes feitos se traduzan en impunidade; por iso, dende o Partido Comunista e a Mocidade Comunista, faremos todo o que estea nas nosas mans para que estes feitos non caian no esquecemento, e Baltar reciba unha resposta contundente por parte das traballadoras e traballadores de Ourense; que de ningunha maneira van padecer máis os abusos e excesos dos políticos burgueses nin dos propios capitalistas.

                Sabemos que non podemos ter ningunha confianza no sistema xudicial burgués, e tamén somos conscientes de que so a organización do pobo e a clase obreira pode facer xustiza fronte os seus abusos e excesos.

NINGUNHA AGRESIÓN SEN RESPOSTA!

ORGANIZADAS E ORGANIZADOS NON CONSINTAMOS OS SEUS ABUSOS!